ይኼ ልቤ . . . አልታወቀ
መቼ አምልጦ እንደመጣ
መቼስ አመል እንዳወጣ
ቤትህ ደርሶ - ደጅ አንኳኩቶ
ሳይታሰብ - አፀድህን ዘልቆ ገብቶ
ሳይጠራ - ከእልፍኝህ ተሰይሞ
ሳይጋበዝ - ከማዕድህ ታድሞ
ሳይታይ - አብሮህ ከዋለ ካደረ
እኔን ትቶ ካንተ መኖር ከጀመረ
ሰ - ነ - በ - ተ
ግና . . . ተግባር እንደል'ም አልቀለለ
እግሬ ልቤን መች ተከተለ
ከደሳሳ ጎጆዬ በራፍ ቆሜ (በሙሉ ዓይኔ እንኳ ሳልደፍር)
የኮራ አፀድህን ሳይ አግድሜ
ዓይኖቼ ሊያዩህ እንደናፈቁ
ጣቶችህ ከእጆቼ እንደ'ልም እንደራቁ
ምን አለብህ . . . በኮራ የንጉስ ርምጃህ
በመንደሩ ተንጎማልለህ
የኔ እግር ብርክ ሳይታይህ
እንደዋዛ ታልፈኛለህ . . .
ባለሹመት አጀበ ብዙ
ገደብ የለሽ ዓለም ደርዙ
ቢያነቅፍህ 'ልነጠፍ' ባይ የማታጣ
መካችህ ብዙ ቢያጋጥምህ የሚቃጣ
እና ለምን . . . እንዴት ተብሎ
ዓይንህ ወደኔ 'ሚያይ አሽቆልቁሎ
ቊንዳላህ ቢፈተሸ - ቢመረመር ቆዳህ
የቆነጃጅት ቃል - ድሪ ጌጣጌጥህ
ዓይናቸው መዋያህ - ልባቸው ማደሪያህ
ታዲያ ማን ከአጀቡ ነጥሎ
ከዙሪያህ የዓይን አዋጁን አግልሎ
ያመላክትህ ክሳይ መልኬን
ባይንህ ያግባ ልጥፍ ዳሴን?
የኔን ዓለም ሞልተህ - መውጣትህ መንጋቱ
ሲሆንልኝ ኖረ - መግባትህ መምሸቱ
ባታስተውለኝም በዓለምህ ባልታይ
ከቤቴም ባይሞላ አዱኛ ወ ሲሳይ
ይህንን አውቃለሁ . . .
ንጉስ ከእረኚት ጋር - በፍቅር ወደቀ
መደምደሚያው ሆና - ሌላ ውበት ናቀ
ስለዚህ . . . እንዲህ ነው ጸሎቴ
ባጠገቤ ስታልፍ አንድ ናት መሻቴ
እንቅፋት በመታህ - በጣለህ ከእርሻዬ
ክፉኛ አንሸራቶህ - ውደቅ ከማሳዬ
ላንዲት ደቂቃ እንኳ - መኖሬን እንድታውቅ
ቁስልህን ለማከም - ኖራለሁ ስናፍቅ
June 2011
Hermy Writes
yayn fikir kfu new.ayinagerut neger firhat;aydebqut neger wey chinq.sew yashawun mafqer yichilal yigebawalim.sew hulu yafeqerewun yagegnal malet gin aydelem beteley yal'acha endehon.sifsif yemtaderg gitim nech....endezih hogne yasalefkutn zemen yastawusegnal.ej yibarkilin
ምላሽ ይስጡሰርዝgreat poem and imagination.
ምላሽ ይስጡሰርዝ